O Tribunal Superior de Xustiza de Galicia (TSXG) desestimou o recurso presentado por Nova Pescanova contra a anulación da sanción imposta pola empresa a unha traballadora que denunciou acoso sexual e laboral por parte dun encargado.

Segundo lembra a CIG nun comunicado, o Xulgado do Social número 5 de Vigo anulou o ano pasado a sanción a unha empregada do Centro Industrial de Pescanova no Porriño, que previamente denunciara diante da empresa acoso sexual e laboral por parte dun encargado, condenando á compañía por vulnerar o seu dereito fundamental a non ser discriminada por razón de sexo e fixando unha indemnización para a afectada de 6.251 euros.

“A partir da denuncia da traballadora, Nueva Pescanova activou un protocolo de acoso moi particular, pensando máis nos seus propios intereses que na vítima“, segundo indicou a CIG, xa que durante o proceso a compañía cometeu “todos os erros” como cambiar á vítima de posto de traballo mentres que o denunciado seguiu co seu emprego.

Dita organización sindical asegura que a empresa “fixo todo o posible” por entorpecer a comisión de acoso encargada de investigar a denuncia. Tras iso, a dirección amoestou por escrito á traballadora acusándoa de entorpecer o traballo da comisión de acoso, feitos que a compañía cualificou de “moi graves”.

“Obviamente impugnamos a amoestación no xulgado reclamando a súa nulidade, e o xuíz non só dános a razón, senón que condena tamén á empresa por vulneración do dereito fundamental a non ser discriminada por razón de sexo e fixa indemnización para a traballadora”, engadiu a CIG.

Esta sentenza foi contra a que Nova Pescanova presentou recurso no TSXG, que este venres foi desestimado.