A Policía Local de Vigo interceptou na madrugada deste venres un home que quintuplicaba a taxa de alcol permitida mentres circulaba pola rúa García Barbón.

Tal como informaron os axentes, os feitos tiveron lugar pasadas as 04,50 horas, cando unha unidade que se atopaba realizando labores de control do tráfico na rúa Areal se decatou da presenza dun vehículo que circulaba de forma “errática”, polo que comezaron a perseguilo.

Cando o home foi consciente da presenza policial, tratou de introducirse nun garaxe privado na rúa García Barbón, sendo interceptado polos axentes.

Resultou ser D.E.P.V., de Vigo e 32 anos de idade, que mostraba “claros signos” de atoparse baixo os efectos do alcol, e deu un resultado positivo nas probas de 1,24 e 1,30 miligramos de litro por aire expirado. Así, instruíronse dilixencias por un delito contra a seguridade viaria, sendo inmobilizado o automóbil.