O BNG de Vigo esixiu ao goberno municipal que reforce o persoal dos servizos sociais municipais, que están “ao límite do colapso”, tras constatar que a cidadanía ten que esperar “3, 4 semanas ou mesmo un mes” para ter unha cita cos traballadores sociais, nunha situación de “agravamento da emerxencia social, agudizada por unha inflacción disparada”.

Así o manifestou, en declaracións remitidas aos medios, o concelleiro nacionalista, Xabier Pérez Igrexas, que lembrou que na cidade hai máis de 60.000 veciños en risco de exclusión e uns 20.000 persoas desempregadas. “É inadmisible que unha cita cos traballadores sociais tarde de 3 semanas a un mes, para iniciar unha primeira xestión, e para abordar situacións críticas”, sinalou.

Pérez Igrexas sinalou que o persoal dos servizos sociais municipais “asumen case 5 veces máis poboación da recomendada polos cocientes oficiais” e urxiu unha resposta “enérxica” do goberno local, encabezado por Abel Caballero.

Respecto diso, o edil do BNG apuntou que “nunca a cidade tivo tantos medios económicos”, tras un 2021 no que quedaron 121 millóns de euros sen executar e cuns remanentes de 70 millóns. “Hai que poñer eses recursos para atender esta situación, e para evitar que a agudización da crise se traduza nun novo saqueo contra a maioría social”, proclamou.