InicioVigo e contornaVigoXunta e Goberno ultiman o deseño da Biblioteca do Estado en Vigo...

Xunta e Goberno ultiman o deseño da Biblioteca do Estado en Vigo e o alcalde sinala que é a súa proposta

O alcalde de Vigo sinalou, cando o goberno local dixo que asumiría a xestión desa biblioteca "se a Xunta non se facía cargo", foi cando o goberno galego cambiou a súa posición. "Obrigámolo, non quería", asegurou o alcalde.

PUBLICADO O

O secretario xeral de Cultura da Xunta, Anxo Lorenzo, mantivo este martes un encontro coa directora xeral do Libro e Fomento da Lectura do Ministerio de Cultura para ultimar os detalles do proxecto de construción da futura Biblioteca do Estado en Vigo, e celebrou que a administración central aceptase a proposta do goberno galego, de construír unha instalación de 8.000 metros cadrados.

Segundo lembrou Lorenzo, a Xunta reclamou “desde o primeiro momento” que a cidade olívica conte non só con esa biblioteca, senón que as instalacións respondan as necesidades da cidade. Respecto diso, lembrou que inicialmente o Ministerio ofrecera unha biblioteca de 4.000 metros cadrados, unha oferta que “contaba co beneplácito do Concello de Vigo”.

A Xunta presentou en 2020 un programa de necesidades, cos espazos e dotacións que reclamaba para esa biblioteca, nunha superficie total de 8.000 metros para responder á demanda existente e de acordo coa poboación da cidade.

“Recentemente o Ministerio de Cultura e Deporte notificou á Xunta que aceptaba a súa proposta”, sinalou o goberno galego, que matizou que, dado que a parcela que ofrece o Concello para esta dotación é de algo menos de 6.000 metros cadrados, o edificio construirase en tres ou catro alturas.

O novo edificio será construído polo Ministerio (que tamén porá o equipamento) e, seguindo o modelo do resto de Bibliotecas do Estado en Galicia, será xestionada pola Xunta.

“OBRIGÁMOLO”

O alcalde de Vigo, Abel Caballero, saíu ao paso do comunicado da Xunta e, nunhas declaracións remitidas aos medios, afirmou que o goberno galego non fixo máis que ratificar “o que hai varios meses” el mesmo adiantou: que a cidade terá unha Biblioteca do Estado de 8.000 metros, situada na parcela que o Concello expropiou detrás dos actuais xulgados.

O rexedor insistiu en que xa hai “certeza” de que esa dotación se vai a facer, a pesar de que a Xunta “se opuxo” e “presionou para que non se fixese”. Segundo Caballero, cando o goberno local dixo que asumiría a xestión desa biblioteca “se a Xunta non se facía cargo”, foi cando o goberno galego cambiou a súa posición. “Obrigámolo, non quería”, asegurou o alcalde.

Caballero lembrou que a Biblioteca do Estado “saíu dos Orzamentos do Estado” cun goberno de Mariano Rajoy (aínda que houbo partidas para esta dotación entre 2009 e 2013), e foi recuperada polo Executivo de Pedro Sánchez (con partidas de novo en 2021, de 100.000 euros, e en 2022, de 50.000 euros).

A construción dunha Biblioteca do Estado en Vigo é unha materia pendente desde o goberno de José Luís Rodríguez Zapatero. O principal obstáculo para que non se fixese realidade a principios os anos 2000 foi a carencia dunha localización adecuada, de feito o Concello chegou a barallar ata media ducia de localizacións diferentes.

Tras a decisión da Xunta de reformar o antigo Hospital Xeral para reconvertelo en Cidade da Xustiza (despois de refugar os terreos expropiados polo Concello na rúa Lalín), o goberno galego ofreceu ceder un edificio dos actuais xulgados para a biblioteca.

Pero a proposta foi rexeitada polo Concello, que propuxo emprazar esa dotación nos terreos expropiados na rúa Lalín e que a Xunta non utilizou nunca. Con todo, a construción non poderá levar a cabo ata que a administración local finalice o proceso de recualificación dese chan que, segundo o alcalde, está na súa fase final e completarase en setembro deste ano.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...