A operación ‘Agida’ levada a cabo pola Garda Civil e coordinada polo xulgado de instrución 6 de Vigo, para desarticular unha rede dedicada á venda de cupóns falsos a nome dunha suposta entidade de discapacitados, saldouse coa detención de tres persoas e a investigación doutras 8, así como coa incautación de diñeiro en efectivo, máis de 300.000 cupóns fraudulentos, e diversos dispositivos informáticos e técnicos para a impresión dos boletos.

Segundo informaron fontes do Instituto Armado, as investigacións iniciáronse en novembro de 2020, cando efectivos da Garda Civil e da Policía Local de Nigrán incautáronse dunha serie de cupóns falsos, moi similares aos do ONCE, que ofrecían supostos premios de ata 30.000 euros.

As pescudas permitiron comprobar que, tras estes billetes, figuraba o nome dunha asociación benéfica de axuda a persoas discapacitadas; pero tanto os teléfonos como os medios de contacto que aparecían para o cobro dos premios non eran máis que unha pantalla para ocultar aos verdadeiros emisores dos cupóns falsos.

Os investigadores policiais constataron que existía unha rede de vendedores discapacitados en diferentes localidades da provincia de Pontevedra, e decatáronse (ao observar que todos os cupóns foran impresos cos mesmos medios técnicos) de que existía toda unha infraestrutura e unha rede de distribución organizadas.

TRABALLADORES SEN CONTRATO

Ao longo dos seguintes meses, a Garda Civil foi solicitando información para localizar aos responsables da fabricación e comercialización dos cupóns, e puideron comprobar tamén que os vendedores a pé de rúa traballaban sen contrato nin protección social, a cambio dunha comisión mínima.

No marco da investigación tamén se pescudou que este grupo viña operando, baixo diferentes denominacións, desde hai máis dunha década, e non só no ámbito galego, senón tamén noutros territorios de España, e causando un grave prexuízo aos vendedores legais de organizacións como o ONCE.

Os axentes identificaron as vías de distribución dos cupóns (principalmente camuflados en paquetería comercial), as canles do fluxo de diñeiro en efectivo (xa que evitaban deixar rastro de depósitos ou transaccións bancarias), e o lugar de fabricación dos boletos.

Como consecuencia de todo iso, procedeuse á detención de dúas veciñas de Vigo, de 73 e 49 anos de idade, consideradas as ‘xefas’ da trama, e tamén do responsable da impresión dos cupóns, un veciño de Moaña de 49 anos de idade, titular dunha imprenta.

Ademais das detencións, procedeuse á investigación doutras 8 persoas, de diferentes partes de Galicia, País Vasco, Andalucía e Estremadura, que participaban, en diferentes graos, nesta organización.

REXISTROS E MATERIAL INTERVIDO

Nos rexistros levados a cabo en varios domicilios e na imprenta de Moaña, a Garda Civil incautouse dunha importante cantidade de dispositivos informáticos, utilizados para o deseño e impresión dos cupóns falsos.

Tamén se interviñeron 11.620 euros en efectivos; contabilidade relacionada con este xogo ilegal; máis de 300.000 cupóns fraudulentos preparados para a súa venda, por importe de 1 e 2 euros (que xerarían neste mercado ilegal uns 360.000 euros para a rede); e outros formatos de xogo ilegais, como uns 30.000 ‘rascas’ falsos.

Os investigadores atribúen ás persoas implicadas os delitos de contrabando, asociación ilícita, pertenza a grupo criminal, branqueo de capitais e delitos contra os dereitos dos traballadores.