A factoría viguesa do grupo automobilístico Stellantis volverá parar a totalidade das súas liñas de produción a partir do próximo luns, día 7 de marzo, debido á falta de determinadas subministracións, en concreto dos microchips necesarios para os seus vehículos.

Así, tal como informou a empresa, o Sistema 1 da fábrica de Vigo, onde se ensamblan os Peugeot 301 e 2008 e o Citroën C-Elysée, parará as súas quendas de mañá, tarde e noite desde o luns 7 de marzo. A previsión é volver ao traballo a partir do luns 14 ás 06,00 horas. Pola súa banda, ao longo da semana informarase de se a quenda do fin de semana traballa ou non.

En canto ao Sistema 2 da factoría, que monta as furgonetas das diferentes marcas do grupo, anula a actividade de todas as súas quendas desde o luns ata o vindeiro luns, 14 de marzo.

Stellantis explicou que continúa sufrindo a falta de aprovisionamento de determinados compoñentes. A crise dos microchips, que afecta a todo o sector automobilístico, obrigou á fábrica a deter a súa produción en reiteradas ocasións nos últimos meses.

Ademais, esta semana foron moitos os rumores que prevían este novo parón de Stellantis Vigo. Este mesmo xoves, a compañía asegurou aos sindicatos que había unha alta posibilidade de que houbese unha diminución da produción a semana que vén, pero ata este venres non confirmaron a maneira na que afectará.