O Concello de Vigo renovará e modernizará as instalacións de atletismo de Balaídos cun “cambio integral” que suporá un investimento de máis de 7,67 millóns de euros, polo que o alcalde, Abel Caballero, pediu á Xunta 3 millóns de euros para o seu financiamento.

En rolda de prensa, o rexedor olívico asegurou que estas instalacións deportivas non son só utilizadas por atletas de Vigo, senón tamén “doutros moitos lugares”, polo que entende que son “supramunicipais” e por iso o Goberno galego debería pagar unha parte da súa reparación.

A obra suporá un “cambio integral” das instalacións, integrando un módulo cuberto, ademais de vestiarios, almacéns, áreas técnicas de competición e unha bancada cuberta. Tamén se instalará unha nova torre de cronometraxe e nova iluminación. Ademais, renovarase o pavimento da pista e humanizarase a zona e o peche das instalacións.

O Concello prevé gastar máis de 7,67 millóns de euros, dos cales, 4,67 millóns serán de fondos municipais e espera que 3 millóns proveñan da Xunta, á que xa se lle solicitou para que o acheguen “de forma inmediata”.