Un mozo, A.C.B. de Vigo e 29 anos de idade, foi detido na cidade olívica por agredir a outro home, S.A.F.P. de Vigo e 34 anos de idade, o cal necesitou oito puntos de sutura no rostro.
Tal como relatou a Policía Local nun comunicado, os feitos ocorreron na madrugada do pasado sábado, sobre as 03,10 horas, cando un particular abordou a unha patrulla para indicarlle que se estaba producindo unha pelexa no interior dun local na zona de Areal.
Unha vez no lugar, observaron a un mozo que saía do citado pub, con feridas sanguentas na cara e co xersei cheo de sangue, quedando baixo a custodia dun dos axentes.
Ante a información dos porteiros do establecemento, que aseguraron que o agresor continuaba dentro do mesmo, os actuantes abordaron ao home, que manifestou non estar en posición de ningún documento de identidade, aínda que facilitou de maneira verbal os seus datos.
Aínda así, negou os feitos, manifestando que non fixera nada, “aínda que presentaba sangue e marcas nas mans e unha erosión na fronte”. O agredido tamén negou ser atacado nun principio.
Este último tivo que ser trasladado ao Hospital Povisa, onde tiveron que darlle oito puntos de sutura. Pola súa banda, debido aos testemuños dos alí presentes, “que recoñeceron sen ningún xénero de dúbidas ao agresor”, o home foi detido pola suposta comisión dun delito de lesións.
