A Escola Universitaria de Estudos Empresariais de Vigo transformouse na Facultade de Comercio, tras máis de dez anos nos que a Universidade de Vigo (UVIgo) tratou de conseguir un “merecido” e “necesario” cambio de denominación.

“O cambio de denominación era unha débeda histórica, algo que levabamos pelexando xa desde 2010″, explicou a directora do centro, Consuelo Currás, quen fixo fincapé en que xa hai anos que as escolas universitarias deixaron de existir, polo que este cambio non é só “merecido” senón tamén “necesario” para adaptar a denominación á nova realidade da universidade galega e estatal.

O cambio de escola a facultade xa fora aprobado pola xunta do centro, polo claustro e polo consello de goberno, polo que estaba pendente o visto e prace do Consello Galego de Universidades, que xa chegou. Agora queda pendente a súa aprobación no Consello da Xunta e o seu envío a Madrid para a aprobación definitiva.

“No funcionamento normal da escola/facultade non haberá cambios substanciais, seguiremos facendo o mesmo que vimos facendo desde que estamos aquí, traballar por seguir consolidando todas as titulacións, mellorando se é necesario e posible, e tratando de adaptarnos ás necesidades que a propia sociedade vainos formulando”, recalcou Currás.