O portavoz municipal do PP de Vigo, Alfonso Marnotes, situouse este mércores en contra do indulto ao exfuncionario condenado por ‘enchufar’ unha cuñada de Carmela Silva, presidenta da Deputación de Pontevedra, nunha concesionaria municipal. En rolda de prensa, Marnotes tachou de “vergoñoso” que o condenado considere como mérito para ser indultado ser militante do PSOE de Vigo durante 40 anos.

“Un funcionario do PSOE pídelle ao Goberno do PSOE que o indulte por ser do PSOE e contratar un familiar dun cargo do PSOE“, lamentou o ‘popular’, tras o que engadiu que se trata dun “auténtico escándalo” xa que, ademais, era unha persoa de “absoluta confianza” de Silva e o alcalde de Vigo, Abel Caballero. Por todo iso, Marnotes considerou que é necesario que o Concello se sitúe, debido aos “graves” delitos polos que foi condenado o exfuncionario, que supoñen un “agravio” para Vigo.

“Non se pode mandar a mensaxe de que neste Concello se poden cometer delitos beneficiando familiares do goberno e que estes delitos queden impunes”, criticou. Todo iso despois de coñecerse que o exfuncionario do Concello de Vigo condenado polo ‘enchufe’ dunha cuñada de Carmela Silva, solicitase o indulto parcial tras ser condenado a 5 anos e 3 meses de cárcere polos delitos de prevaricación e malversación. Así mesmo, pediu a suspensión da execución da pena de prisión en tanto non se resolva a solicitude do indulto.

Francisco Javier G.O. foi condenado pola Audiencia Provincial de Pontevedra por favorecer a contratación da familiar de Silva, a través de varios contratos menores, nunha empresa que prestaba servizos para o Concello. O tribunal, que tamén condenou un responsable de dita empresa, considerou probado que a cuñada de Silva percibiu máis de 100.000 euros por uns traballos que non chegou a realizar.

O representante legal do condenado, que pediu a xubilación voluntaria tras a sentenza (xa declarada firme polo Tribunal Supremo) e trasladouse a vivir a Cantabria, expón para apoiar a súa petición de indulto que Francisco Javier G.O. é “un delincuente primario”, que non ten antecedentes nin posibilidade de reincidir.

No escrito remitido ao Ministerio de Xustiza, faise un relato pormenorizado dos méritos que xustificarían a medida de graza. Así, lémbrase que o funcionario xubilado dedicou a “práctica totalidade” da súa vida a defender os dereitos dos traballadores, que é afiliado a UGT e ao PSOE, ou que se formou profesionalmente para progresar dentro da administración municipal, obtendo “con gran esforzo” o título de Graduado Social pola Universidade de Santiago.