A Xunta, a través da Fundación Cidade da Cultura, e a Universidade de Vigo (Uvigo) impulsan a Residencia ComTecArt, unha iniciativa na que 17 estudantes e recentemente graduados de diferentes perfís e titulacións traballarán conxuntamente nas instalacións do Gaiás no deseño e desenvolvemento do primeiro nivel dun videoxogo inspirado nunha obra literaria galega.
A directora xerente da Cidade da Cultura, Ana Isabel Vázquez; o vicerreitor do campus de Pontevedra, Jorge Soto; e a integrante do grupo ComTecArt, Beatriz Legerén, presentaron este martes esta “experiencia pioneira en Galicia”.
A iniciativa toma o seu nome do grupo de innovación docente ComTecArt, que desde fai cinco anos leva a cabo nas aulas unha experiencia similar, con alumnado da Facultade de Ciencias Sociais e da Comunicación e da Escola de Enxeñaría de Telecomunicación.
Segundo destacou Legerén, esta “experiencia multidisciplinar” reúne a alumnos de diferentes graos para traballar conxuntamente no deseño dun videoxogo, en cuxo desenvolvemento “se combina a parte creativa e narrativa, con pártea da arte e tecnoloxía”, todo isto mesturado á súa vez “coa xestión de proxectos”.
“Dentro do videoxogo, hai deseño, hai cultura, hai esa parte que se basea nunha obra literaria galega”, apuntou Ana Isabel Vázquez, que puxo en valor a aposta por ser “factoría de contidos” que recolle o novo Plan Estratéxico Cidade da Cultura (2021-2027), que avoga tamén por impulsar a creación dixital e o sector dos videoxogos en Galicia.
Pola súa banda, Jorge Soto incidiu na vontade das dúas institucións de ir “moito máis alá” nesta liña de traballo conxunto e anunciou a próxima firma dun convenio marco de colaboración en diferentes actividades, “que poden ir desde o desenvolvemento de proxectos de investigación, á organización de todo tipo de actividades académicas”, así como outra serie de iniciativas.
Esta residencia desenvolverase ao longo de cinco fins de semanas entre o 5 de marzo e o 3 de abril, catro deles con traballo presencial e un virtual. O prazo de presentación de solicitudes, a través da sede electrónica da UVigo, permanecerá aberto ata o 11 de febreiro. A selección farase partir dunha serie de criterios, como a titulación que cursan, a súa formación nas áreas relacionadas cos distintos perfís necesarios para o deseño e desenvolvemento dun videoxogo ou a súa experiencia neste campo, así como a súa creatividade, capacidade de traballo en equipo, habilidades de comunicación e manexo do motor gráfico Unity.
