O alcalde de Vigo, Abel Caballero, asegurou que o proxecto construtivo do ascensor Halo, que unirá a rúa Rosalía de Castro con Vía Norte, está xa redactado e listo para a súa aprobación, polo que leste mesmo mes de febreiro podería iniciarse a súa licitación. En rolda de prensa, o rexedor vigués indicou que queda pendente a autorización de ADIF e do Ministerio de Transportes, que van “moi avanzadas” e teranse “de forma inmediata”.
“Temos os recursos, temos o diñeiro e o proxecto. Imos facer un dos grandes ascensores que hai en ningunha cidade de España”, reivindicou Caballero. O alcalde tamén informou de que este martes o Boletín Oficial do Estado (BOE) publicou a relación definitiva de solicitudes admitidas para revisión, avaliación e axudas do Ministerio de Transportes con fondos europeos.
Neste apartado, Vigo presentou dous proxectos, ambos os admitidos para avaliación. O primeiro deles consta de catro actuacións, entre elas o ascensor Halo e as ramplas de Gran Vía, que poderían recadar ata 13,3 millóns de euros. O segundo proxecto, que suporía 8,8 millóns de euros, recolle varias actuacións como a humanización de García Barbón, varios ascensores entre rúas ou accesos a colexios, entre outros.
