As áreas sanitarias de Vigo e Pontevedra-O Salnés xestionaron a doazón de máis de 120 órganos e tecidos o ano pasado, mantendo así “altos niveis” de actividade relacionados coas doazóns e os transplantes.

En concreto, no Complexo Hospitalario Universitario de Vigo (Chuvi) contabilizou un total de 17 doantes de órganos de cadáver, dos que se extraeron 65 órganos (5 corazóns, 15 fígados, 1 páncreas, 14 pulmóns e 30 riles) e 49 tecidos (córneas, ósos e segmentos vasculares).

“Estamos moi satisfeitos xa que seguimos mantendo a actividade nun contexto complicado e aínda que rexistramos tres doantes menos que o ano anterior, resultaron ser doantes moi efectivos. Isto sería imposible sen o compromiso de doantes e familiares”, subliñou o coordinador de transplantes do Chuvi, Lucas Lage.

Dos 65 órganos doados, un 32% saíron de Galicia, mentres que o resto quedou en Galicia. A principal causa da morte do doante foi accidente cerebrovascular (70%), seguido de lesión cerebral por parada cardíaca (18%).

Pola súa banda, na área de Pontevedra e O Salnés xestionouse a doazón de 11 órganos e 9 tecidos, debido a que cinco doantes cederon os seus corpos. Deles, só un tiña menos de 65 anos, mentres ata 3 superaban os 75 anos.