Vigo terá voos directos a Santander este verán, despois de que a aerolínea Air Nostrum, franquiciada de Iberia para voos rexionais, anunciase que conectará dúas veces por semana a cidade olívica coa capital de Cantabria.

Nun comunicado, a compañía informou que a partir deste martes porá á venda os voos, que conectarán Vigo con Santander os xoves e os sábados desde o 23 de xullo ata o 3 de setembro. Ademais, Air Nostrum tamén establecerá voos desde Santander ata Granada e Xerez.

“Trátase de tres destinos inéditos na grella do aeródromo cántabro cos que buscamos abrirnos a novos mercados e ampliar a conectividade de Cantabria co territorio nacional“, indicou o conselleiro de Industria, Turismo, Innovación, Transporte e Comercio, Javier López Marcano, tras reunirse cos responsables da aerolínea a semana pasada na Feira Internacional do Turismo (Fitur), levada a cabo en Madrid.

Segundo o conselleiro cántabro, este tres destinos son, á súa vez, “interesantes” para os cántabros. “Son tres rutas que abren moitas posibilidades ao sector turístico, pero tamén beneficiosos para viaxes de negocios e empresariais”, engadiu.