Axentes da Policía Local de Vigo detiveron a un veciño da cidade, B.G.A., de 34 anos de idade, como presunto autor dun delito de violencia de xénero, tras ameazar e agredir á súa exparella na vía pública. Segundo informaron fontes policiais, os feitos ocorreron na madrugada deste martes, cando o 092 recibiu unha chamada dunha testemuña que alertaba de que unha parella estaba a discutir de forma acalorada na rúa.
Os axentes desprazáronse á zona e, grazas á descrición facilitada pola testemuña, conseguiron localizar aos implicados na pelexa. Ao entrevistarse coa muller, esta explicou que discutira co seu exmozo, e que este a agredira e ameazara de gravidade, polo que os policías procederon á detención do sospeitoso como presunto autor dun delito de violencia de xénero.
