O Sindicato de Enfermaría Satse denunciou publicamente a “nefasta xestión” do Servizo Galego de Saúde no relativo á contratación de enfermeiros e enfermeiras na área de Vigo xa que, segundo as súas cifras, existen profesionais xubilados que están a traballar porque “supostamente” non hai persoal en lista, a pesar de que ata 20 persoas están a esperar a ser chamadas en ditas listas.

“O máis rechamante desta falta de xestión é que eses profesionais que están nas súas casas son totalmente necesarios nestes momentos, tanto en Atención Primaria, como en hospitalaria”, lamentou Satse. Para o sindicato, isto supón un “total despropósito” por parte do Sergas, que debería ter unha previsión de traballo “máis organizada”.

Neste sentido, explicou que o Sergas sempre mostrou a súa preocupación pola falta de profesionais da enfermaría. “Con todo, agora que tiña a oportunidade de mellorar a situación de sobrecarga coa reincorporación voluntaria de xubilados, deixa ás enfermeiras de listas nas súas casas para seguir con déficit de persoal”, lamentou.

Así, a secretaria autonómica de Satse en Galicia, Malules Carbajo, lembrou que a principio de ano recorreuse a xubilados voluntarios para a vacinación masiva e o covid auto, “pero a condición de que non houbese enfermeiras nas listas de contratación”. No entanto, agora segue ocorrendo na área sanitaria de Vigo, onde hai 20 profesionais á espera de ser chamados. Para o sindicato de enfermaría, esta situación é “intolerable” e unha “falta de respecto” cara ás enfermeiras que o deron todo “e agora déixanas tiradas”, a pesar de ser “imprescindibles”. Por todo iso, esixe a contratación “inmediata” de todos os profesionais que están desocupados.