O consello de goberno da Universidade de Vigo (UVigo) deu luz verde ao maior orzamento da súa historia para 2022, 198,7 millóns de euros, dos que máis de 155 millóns son ingresos ordinarios.
Nunha sesión celebrada este martes, o vicerreitor de Economía, José María Martín, explicou que esta partida confirma “a senda de estabilidade orzamentaria da institución académica” e “permitirá seguir avanzando en eixos estratéxicos do programa de goberno, especialmente centrados nas persoas”, segundo detalla a universidade.
Así, o último proxecto de orzamentos do actual equipo de goberno foi aprobado por unanimidade e deberá ser ratificado polo Consello Social o próximo 28 de decembro.
O aumento da contía respecto de 2021 débese ao incremento en axudas ao amparo do Plan de Recuperación, Transformación e Resiliencia e a achega do Plan de Financiamento do Sistema Universitario de Galicia (SUG) 2022-2026. No orzamento de 2022 o capítulo de contas de persoas crece un 4,73% ata o 61,59% do total, 122,4 millóns de euros.
O consello de goberno tamén aprobou un teito de gasto non financeiro para 2022 por importe de 164 millóns de euros e unha declaración institucional sobre a loita contra a fraude na que a universidade compromete combater esta práctica e os conflitos de intereses na xestión de asuntos públicos.
Adicionalmente, deuse luz verde á concesión a 49 estudantes de Premios Extraordinarios de grao correspondentes a 2020-21 e o regulamento do Comité de ética de investigación con seres humanos e medio ambiente (Ceishma), ademais da a modificación do regulamento do Comité de ética de experimentación animal.
