A Xunta de Goberno Local do Concello de Vigo deu luz verde este xoves ao expediente de contratación e prego de condicións para a licitación da subministración eléctrica na iluminación pública e dos edificios municipais para os anos 2022, e será enerxía eléctrica de orixe “cento por cento renovable”.
Así o confirmou nunha rolda de prensa o alcalde, Abel Caballero, quen explicou que o contrato é para o período de marzo 2022 a febreiro de 2023, con posibilidade de prorrogalo catro meses. Para este contrato, o Concello reserva un orzamento de 6,5 millóns de euros e, entre as condicións do mesmo, contémplase que a orixe da enerxía sexa “cento por cento renovable”.
“Vigo lidera o uso de enerxía renovable nos espazos públicos”, proclamou Caballero, quen engadiu que a enerxía que utilice o Concello non emitirá “nin un gramo de CO2 á atmosfera”.
