O Porto de Vigo volveu a obter a certificación ambiental específica para portos da Unión Europea (UE) Ecoports Port Environmental Review System (PERS), que foi concedida pola Organización Europea de Portos Marítimos (ESPO).

Segundo detallou a Autoridade Portuaria de Vigo, a certificación PERS da Asociación de Portos foi realizada pola Lloyd’s Register, que mide o grao de cumprimento dos parámetros de desenvolvemento sustentable en máis dun centenar de portos.

En concreto, o Porto de Vigo obtivo unha puntuación de 98,11 sobre 100 e situouse entre os portos do mundo con mellor cualificación de novo. De feito, a terminal olívica sempre obtivo puntuacións superiores a 96 sobre 100.

Por outra banda, recentemente o Porto de Vigo participou en Bruxelas (Bélxica) na Asemblea Xeral da Organización Europea de Portos Marítimos (ESPO), da que forma parte. Neste contexto, presentáronse os proxectos finalistas a uns premios europeos ambientais, os ESPO Awards 2021.

Así, unha delegación do Porto de Vigo, acompañada por membros da Fundación Galicia Europa, desprazouse a Bruxelas. Deste xeito, o xefe do Departamento de Sustentabilidade da Autoridade Portuaria de Vigo, Carlos Botana, presentou o proxecto ‘Peiraos do Solpor’, que busca a transformación de infraestruturas portuarias ‘grises’ en ‘verdes’.

Tras a exposición, o xurado valorou a iniciativa por innovación a nivel ambiental e social. Neste sentido, os especialistas consideraron que o proxecto representa unha resposta contra o cambio climático, a perda da biodiversidade e a acidificación dos océanos, xa que a mellora dos ecosistemas e o fortalecemento de especias autóctonas permiten combater especies invasoras.

VISITA INSTITUCIONAL

Noutra orde de cousas, o presidente da Autoridade Portuaria de Vigo, Jesús Vázquez Almuiña, e a directora executiva da Axencia Europea de Pesca (EFCA, polas súas siglas en inglés), Susan Steele, reuníronse este martes na urbe olívica.

Na que foi a primeira visita realizada ao Porto de Vigo desde que asumise a Dirección Executiva da Axencia Europea de Pesca, Steel asistiu a unha presentación oficial da Autoridade Portuaria e coñeceu o centro de control, así como as instalacións da terminal.