O Concello de Vigo adxudicou a segunda fase da reforma da Gran Vía por 4,2 millóns de euros, unha actuación que levará a ampliación das ramplas mecánicas dispoñibles e que se desenvolverá tras a tempada do Nadal durante oito meses.
Nunha rolda de prensa celebrada na urbe olívica, o alcalde, Abel Caballero, destacou que as novas ramplas mecánicas instalaranse no tramo da avenida Gran Vía comprendido entre as súas confluencias coas rúas Venezuela e Nicaragua e asegurou que a actuación permitirá dispor de “un verdadeiro xardín botánico” exterior e interior na zona.
En concreto, detallou que se instalarán dúas ramplas –unha delas entre as rúas Venezuela e Bolivia e outra entre esta última e a rúa Nicaragua– e indicou que estas disporán de “un sistema de aforro enerxético” e “enorme eficiencia”. Ademais, poderán transportar ata un máximo de 7.300 persoas por hora.
Abel Caballero lembrou que o orzamento da primeira fase da actuación, que permitiu instalar ramplas mecánicas na avenida Gran Vía dende a rúa María Berdiales ata Venezuela, ascendeu a 5,2 millóns de euros. Por tanto, resaltou que o investimento total ao adxudicarse a segunda fase alcanzará case 10 millóns de euros e afirmou que a finalización do proxecto permitirá dispor de “un verdadeiro xardín botánico” con “ausencia de ruído” e “emisións cero”.
Con todo, lamentou que o Concello tivese que “gañar nos tribunais” á Xunta para poder licitar a segunda fase da actuación debido a “unha operación política contra Vigo”, que, ao seu xuízo, exerceu o presidente do Goberno galego, Alberto Núñez Feijóo. Así, apuntou que o Tribunal Superior de Xustiza de Galicia (TSXG) avalou estender a instalación das ramplas mecánicas á parte superior da avenida Gran Vía.
