O alcalde de Vigo, Abel Caballero, asegurou este xoves que o Goberno construirá pantallas acústicas no tramo da AP-9 desde Chapela (Redondela) ata o centro da cidade, despois de que o Boletín Oficial do Estado (BOE) publicase nas últimas horas o anuncio de información pública do proxecto, no que só se contempla a instalación deses paneis entre Rande e Chapela.

Así o trasladou o rexedor nunha rolda de prensa na que explicou que, tras constatar que a información publicada no BOE excluía as pantallas acústicas no barrio de Teis e no centro da cidade, púxose en contacto co secretario xeral de Infraestruturas, Sergio Vázquez, para facerlle saber que é “imprescindible e moi convininte” que esa medida se tome ao longo de todo o trazo da autoestrada ata a súa entrada no centro da urbe.

O alcalde apuntou que, precisamente, a maior parte de volume de tráfico acumúlase nese tramo urbano da autoestrada, polo que deben instalarse pantallas acústicas que, por outra banda, foron demandadas polos veciños de Teis de forma reiterada nos últimos anos. De feito, esas pantallas formaban parte das medidas previstas para paliar os efectos da ampliación da AP-9.

Segundo Abel Caballero, o secretario xeral de Infraestruturas compartiu o seu punto de vista e comprometeuse á instalación de pantallas acústicas ata o centro de Vigo, con cargo a financiamento da UE. “Agradezo a súa sensibilidade (…), inmediatamente me dixo que si”, valorou o rexedor.

CRÍTICAS VECIÑAIS

Por outra banda, tras facerse público o anuncio de sometemento a información pública do proxecto, a Asociación de Veciños de Teis lamentou que a colocación de pantallas só se contemple para as zonas de San Adrián de Cobres, Cabanas e Chapela, pero non para a súa parroquia, o que cualificaron como “unha discriminación”

A entidade veciñal lembrou que leva “anos reivindicando unha actuación urxente” nese tramo de autoestrada para paliar a contaminación acústica, e sinalou que o Plan de Acción contra o Ruído (2ª fase), pendente de aprobar desde 2016, recolle 26 zonas de actuación en todo o Estado, entre elas, o tramo da AP-9 entre Teis e o centro de Vigo.

Así mesmo, o Mapa Estratéxico de Ruído (MER) elaborado pola concesionaria da autoestrada, Audasa, en 2012, recolle “datos moi preocupantes” sobre os niveis de ruído en Teis, onde unhas 5.000 vivendas e máis de 13.500 persoas están expostas a niveis de máis de 55 decibeis; mentres que hai case 4.300 veciños que soportan valores superiores a 60 decibeis.

“É un escándalo que o tramo Teis-Vigo non se inclúa na instalación de pantallas acústicas, cando é un tramo con vivendas a escasos metros da autoestrada”, apuntaron os veciños, que anunciaron que se dirixirán á ministra de Transportes, Mobilidade e Axenda Urbana, Raquel Sánchez, para que non permita “esta discriminación, que xa é reiterada”.