O Tribunal Supremo deu de novo a razón a Audasa, despois de declarar nunha sentenza previa que o Goberno central debía abonar á concesionaria Audasa os case 14 millóns que deixou de cobrar desde 2017 ao decidir o Executivo de Mariano Rajoy baixar á metade a compensación pola supresión das peaxes de Rande e A Barcala, na AP-9.
A concesionaria presentou un incidente de execución para que se fixase unha cantidade exacta e se executase a sentenza. No novo fallo do Supremo, do 14 de outubro, faise constar que non hai “ningunha dúbida” sobre a necesidade de “acoller a formulación da executante, tanto na contía reclamada como no suxeito obrigado ao pago”.
A suma a abonar supera os 13,8 millóns de euros e o propio auto subliña que a Administración do Estado “vén recoñecela como a cantidade que corresponde á concesionaria executante polo período de tempo reclamado e en aplicación do réxime xurídico concesional imposto pola sentenza”.
Sobre o suxeito obrigado ao pago, agrega que “a sentenza expresamente impón a condena á Administración Xeral do Estado”, aínda que “sen prexuízo do dereito que poida asistirlle fronte á Administración da Comunidade Autónoma de Galicia como consecuencia dos efectos que poidan derivarse dos compromisos acordados no ano 2006”.
Precisa, así, que “a cuestión suscitada sobre este extremo en fase de execución é allea por completo á pretensión articulada pola parte executante e ao ámbito de execución fixado na sentenza”, en relación coas alegacións efectuadas por ambas as Administracións públicas. Con estes argumentos, a Sala acorda que o Goberno deberá abonar á executante a suma de case 14 millóns de euros en concepto de retribución da concesión polos anos 2017 (desde o 31 de xullo), 2018 e 2019.
