Un acusado de atropelar a unha axente da Policía Local de Vigo tras saltar un control, aceptou a pena de 2 anos de prisión, e o pago dunha indemnización, de maneira que eludirá o ingreso no cárcere, segundo o acordo de conformidade pactado este xoves.
O procesado estaba citado para un xuízo na sala do Penal 1 da cidade olívica, pero finalmente as partes chegaron a un acordo e aceptou esa pena. Ademais, aplicóuselle a atenuante moi cualificada de reparación do dano, xa que consignou practicamente toda a indemnización.
A Fiscalía pedía para el inicialmente 4 anos de cárcere, como autor dun delito de atentado contra axente da autoridade, en concurso ideal cun delito de lesións. E reclamaba que indemnizase á axente ferida en algo máis de 1.500 euros.
Os feitos ocorreron, segundo o escrito de acusación pública, na tarde do 2 de maio de 2020, cando o acusado circulaba no seu coche pola Avenida de Castrelos. Na confluencia coa rotonda que hai fronte ao cemiterio de Pereiró había un control da Policía Local e os axentes déronlle o alto.
O condutor, con todo, fixo caso omiso e, dando un xiro brusco para evitar ese control, acelerou e emprendeu a fuxida. Así, a pesar de que foi requirido en varias ocasións pola Policía Local para que se detivese, seguiu fuxindo, ata que se meteu por un viario no que se atopou de fronte cunha axente do 092.
Aínda que inicialmente detivo o coche, a continuación acelerou e atropelou á policía, que acabou caendo sobre o capó do vehículo e tivo que agarrarse cando o condutor acelerou novamente. A funcionaria acabou deixándose caer por un lateral do coche para evitar sufrir danos maiores.
O condutor continuou a súa fuxida ata que foi finalmente interceptado por outro axente, que acabou colocando a roda da súa moto sobre a porta do condutor para que este accedese a deterse. Debido ao atropelo, a axente sufriu contusións na perna e no pulso dereitos, das que tardou en recuperarse case un mes, aínda que non quedaron secuelas.
