O consello da Xerencia de Urbanismo de Vigo aprobará o martes o inicio da tramitación ambiental para “adaptar o chan” onde se construirá a futura Biblioteca do Estado, segundo avanzou este venres o alcalde da cidade, Abel Caballero.

En declaracións remitidas aos medios, o rexedor sinalou que esa construción está “pendente dun expediente urbanístico para adecuar o chan”, que se require dunha avaliación ambiental estratéxica.

Segundo avanzou, esa tramitación iniciarase a partir do martes e, por tanto, a obra de construción desa infraestrutura cultural “xa non hai quen a pare”.

Respecto diso, Abel Caballero asegurou que o Ministerio de Cultura “concedeu” a construción da Biblioteca, que será financiada “ao cento por cento” polo Goberno de España, e lamentou que a Xunta “se opón” ao proxecto e “séguelle dicindo ao Ministerio que non a faga”. “Pero o Ministerio vaina a facer, gústelle á Xunta ou non”, resolveu o primeiro edil vigués.