A Asociación de Industrias do Metal e Tecnoloxías Asociadas de Galicia, Asime, volveu a facer un chamamento ás autoridades da UE e dos países membros para que aposten pola implantación de factorías de transformación de materias primas e de produción de tecnoloxías que atenúen a dependencia doutros países, e poder así “paliar” os efectos da chamada ‘crise dos microchips’.

Así o trasladou, en declaracións aos medios, o secretario xeral da asociación, Enrique Mallón, quen constatou que eses problemas de aprovisionamento de tecnoloxías como os semiconductores (microchips) están a afectar non só á automoción, senón tamén a outras industrias, como a aeronáutica ou a fabricación de maquinaria especial.

Respecto diso, puxo como exemplo o sector do automóbil, “estratéxico” en España e na UE, e que espera bater marcas en 2021, un obxectivo que xa non se poderá cumprir “a causa exclusivamente” desa crise mundial de chips.

Mallón sinalou que este problema “sobrevindo”, que “sorprendeu” ás empresas, especialmente ás pemes, ten como consecuencia un incremento do diálogo social, posto que as compañías teñen que reforzar o contacto cos representantes dos seus persoais para abordar medidas e adaptarse a esa situación, que se converteu en “un xogo xeoestratégico e xeoeconómico”.

Nese sentido, apuntou que, por regra xeral, os representantes dos traballadores “entenden” que haxa que aceptar certas medidas, porque se creou un escenario “que ninguén buscou” e que impide que as empresas, incluso as máis relevantes, poidan deseñar a súa planificación.