O alcalde de Vigo, Abel Caballero, fíxose eco da publicación no Diario Oficial de Galicia (DOG) este venres da modificación puntual do plan urbanístico que permitirá a reordenación do ámbito do Barrio do Cura, e vaticinou que a zona estará chea de “guindastres” en “uns meses”.

Nunha rolda de prensa, o rexedor olívico sinalou que, coa publicación no DOG, a aprobación desa actuación xa é “definitiva” e explicou que o goberno municipal está xa traballando no proxecto de compensación, que foi presentado pola empresa.

Así mesmo, avanzou que “en breve espazo de tempo”, o Concello contará tamén co proxecto de urbanización. “Isto significa que aquilo que dicía de que dentro duns meses haberá guindastres no Barrio do Cura xa é unha realidade incontestable”, proclamou.