Os servizos de emerxencia rescataron na tarde deste martes a dous mozos que envorcaron cun veleiro no que navegaban fronte á Praia da Buraca, en Vigo.
Ao redor do catro menos vinte da tarde, un particular púxose en contacto co 112 Galicia para advertir de que unha embarcación envorcara fronte a este areal.
Nesa mesma comunicación, informaba de que había dúas persoas na auga que tentaban neses momentos darlle a volta ao barco.
Con estes datos, os xestores do 112 Galicia deron aviso aos socorristas de Vigo, a Salvamento Marítimo, ao Servizo de Gardacostas de Galicia, á Policía Local e á Garda Civil.
Xa no lugar, os socorristas confirmaron que se trataba dun veleiro e que os dous ocupantes, menores, estaban ben, polo que os ían achegar eles mesmos ata terra.
Ademais, ata o punto tamén se desprazou, noutra embarcación, o dono do veleiro que, tras tentar darlle a volta, tamén tivo que ser trasladado polos servizos de emerxencia ata o porto.
Ao final da súa intervención, os socorristas informaron o Centro Integrado de Atención ás Emerxencias de Galicia que o tres persoas estaban xa fose da auga e que foran evacuadas por eles ata o Porto de Canido, onde os dous menores recibiron asistencia sanitaria por posible hipotermia.
