O alcalde de Vigo, Abel Caballero, advertiu este venres de que se reforzará a vixilancia policial este fin de semana para evitar “botellóns indebidos e indesexados, festas ilegais e reunións mal feitas“, e pediu non cometer “insensateces” porque os contaxios non só repercuten na saúde, senón tamén na economía.

Nunha rolda de prensa, o rexedor olívico constatou que, á luz da evolución da pandemia, a cidade vai “por boa senda”, reducindo progresivamente a incidencia acumulada da Covid, pero incidiu en que esa tendencia debe manterse e advertiu de que este fin de semana, máis longo do habitual pola festividade do luns de San Roque, haberá vixilancia policial enfocada a evitar ese tipo de reunións.

Respecto diso, lembrou que un botellón este fin de semana significará novos contagios en próximos días e, “aínda que pareza que non pasa nada, si que pasa, e moito”. “Os botellóns son contaxio, risco, enfermidade e economía que cae”, proclamou.

Así, Abel Caballero apuntou que a campaña turística de verán está “a ir moi ben” en Vigo, e pediu non truncar esas boas expectativas, á vez que reiterou que a hostalaría está a ter un “comportamento moi bo” en termos de prevención do Covid e “é segura”.