Galicia mantén os contaxios de Covid-19 por encima do milleiro por terceiro día consecutivo, tras iniciar esta semana por baixo, aínda que cun lixeiro descenso a 1.018; mentres que os casos activos descenden a 18.195. Por contra, os pacientes hospitalizados ascenden a 308 –seis máis– e a taxa de positividade repunta a un 13,5 por cento.

Concretamente na área de Vigo, segundo os datos actualizados na mañá deste venres pola Consellería de Sanidadecon rexistros de ata as 18,00 horas do xoves, a presión hospitalaria mantense con sete en críticos e 53 noutras unidades. Pola súa banda, os casos activos descenden en 203 ata situarse nos 4.420, colocándose así como a segunda área máis afectada pola Covid só despois da Coruña e Cee.

En Galicia foron confirmados 1.011 positivos por Probas Diagnósticas de Infección Activa (PDIA) no último día (que poden corresponder a casos activos doutras xornadas aos que se realiza unha nova proba diagnóstica), que supoñen 92 menos que o día anterior, dos cales 395 corresponden á área da Coruña e Cee; 176, á de Vigo; 135, á de Lugo; 97, á de Pontevedra e O Salnés; 96, á de Santiago e Barbanza; 62, á de Ferrol; e 50, á de Ourense.

En canto á taxa de positividade das PCR, ascende a un 13,54 por cento despois de baixar a un 12,9% o día anterior tras repuntar a un 15% o mércores, caer a un 12% o martes e iniciar esta semana cun repunte do 14,98%. Así, Galicia segue por encima dese 5% que establece a OMS para dar por controlada a pandemia, un limiar que, ata fai catro semanas, non superaba desde o 15 de febreiro.