O conselleiro de Sanidade, Jesús Vázquez Almuiña, e o alcalde de Pazos de Borbén, Andrés Igrexas, presentaron durante a mañá deste martes o proxecto de reforma e ampliación do centro de saúde de Pazos de Borbén. Os traballos contan cun orzamento de 148.000 euros que serán financiados polo SERGAS, e está previsto que finalicen no mes de marzo de 2019.
A reforma consiste na demolición da segunda planta do edificio anexo ao actual centro de saúde, destinado antigamente á vivenda do médico, e a reforma e reorganización de espazos para as novas estancias.
O edificio resultante respectará as características da construción orixinal grazas á conservación das fachadas e a unificación da cuberta. Deste xeito, o centro de saúde pasará de ter 112 metros cadrados a case 190 metros, “e supoñerá unha gran mellora na calidade do servizo para os veciños”, manifestou o alcalde de Pazos de Borbén, Andrés Igrexas.
O proxecto presentado este martes “é a resposta a un compromiso persoal adquirido fai tempo co conselleiro e que eu fixen extensible aos máis de 1500 usuarios deste centro de saúde”, indicou Igrexas, que explicou que “o prazo de finalización do centro é a finais do mes de marzo, aínda que intentaremos reducir ao máximo todos os prazos para que o centro de saúde este dispoñible canto antes”.
A reforma e ampliación do centro de saúde de Pazos de Borbén inclúe a dotación de diferentes espazos necesarios para mellorar a atención aos usuarios, como unha sala de espera polivalente, unha sala de espera para pediatría, a adaptación e modernización de diferentes estancias como as consultas e oficinas, así como a ampliación de espazos para servizos e almacéns.
Unha vez terminado, o centro de saúde de Pazos de Borbén contará cunha consulta de medicina xeral, unha sala de enfermería, unha sala polivalente, unha consulta de pediatría-matrona, unha sala de espera pediátrica, almacén, vestiarios e aseos.
Ademais, adecuarase o edificio ás normas sobre accesibilidade cunha rampla desde o exterior á entrada principal. Do mesmo xeito instalarase unha saída de urxencia na fachada traseira do centro.
