O Tribunal Superior de Xustiza de Galicia (TSXG) desestimou o recurso da Federación de Asociacións Veciñais Eduardo Chao (Favec) de Vigo contra o Concello polo cesamento da autorización de uso do inmoble que ocupa na praza da Princesa durante a execución dunha reforma e confirmou o seu desaloxo no prazo de dous meses.

Na sentenza, contra a que cabe recurso, o alto tribunal galego confirmou o auto do Xulgado do Contencioso-administrativo 2 de Vigo e desestimou o recurso da federación, que pediu a suspensión cautelar do cesamento da autorización do dereito ao uso da planta segunda do inmoble que se aplicará durante 13 meses.

Os xuíces sinalaron que o interese do Concello por levar a cabo obras no edificio no que se atopa a Favec e a urxencia das mesmas polo seu financiamento con fondos europeos con prazos perentorios de xustificación “han de prevalecer fronte aos da entidade recorrente”.

Ademais, recalcaron que a federación veciñal “non tratou de acreditar nin a relevancia das súas actuacións nin que durante o prazo polo que haberá de prolongarse o desaloxo teña programadas actividades que se vexa imposibilitada de levar a cabo”.

Así mesmo, o tribunal apuntou que a entidade “pretende manterse na dispoñibilidade dun local de determinadas características”. Con todo, concluíu que debido á “excepcionalidade” da reforma e a “limitación temporal” da privación do uso da segunda planta do edificio da praza da Princesa “debería limitar a súa petición a un local cuxas condicións lle permitan manter as actividades programadas e que resulten mínimas para o seu desenvolvemento”.