O alcalde de Vigo, Abel Caballero, avanzou que a Xerencia Municipal de Urbanismo aprobará este martes de modo definitivo a modificación puntual do Plan Xeral de Ordenación Municipal (PXOM) para a reordenación do Barrio do Cura, cuxas obras prevé que comecen nun ano.
Posteriormente, o acordo alcanzado na Xerencia levará a un pleno extraordinario para a súa aprobación, tras o que será publicado no Diario Oficial de Galicia (DOG) e o Boletín Oficial da Provincia de Pontevedra (BOPPO). Tamén estará dispoñible na páxina web do Concello e o Portal de Transparencia.
Ademais, o rexedor apuntou que, tras a aprobación definitiva da modificación do Plan de urbanismo, a promotora poderá presentar os proxectos de urbanización e compensación, que contarán coa súa propia tramitación administrativa.
Por outra banda, sinalou que este martes a Xerencia Municipal de Urbanismo tamén dará luz verde ao expediente de contratación das obras de execución do paseo fluvial do río Lagares entre Manuel Álvarez e a avenida de Madrid. Así, lembrou que este tramo conta cunha lonxitude de 3,3 quilómetros e que o custo da obra e a expropiación supera os 1,2 millóns de euros.
Noutra orde de cousas, Abel Caballero deu conta do nomeamento como funcionarios de 16 bombeiros, catro deles condutores, de acordo coas prazas da Oferta Pública de Emprego (OPE) realizada. Así mesmo, indicou que a persoal se incrementará con outros 15 efectivos interinos.
