CIG avanzou que continuará a denuncia de “presuntas irregularidades” no destino dos fondos de UNESPA –un imposto finalista que debe ser investido no servizo de bombeiros do Concello de Vigo– e o pago de horas extra ao equipo de extinción de incendios.

Para iso, sinalou que recompila “datos” co obxectivo de demostrar a “veracidade” destas “presuntas irregularidades” despois de que o Consello de Contas arquivase as denuncias presentadas por este sindicato, CC.OO. e CUT ao non observar “ningún medio que acreditase” as mesmas.

Así mesmo, a central criticou que o alcalde, Abel Caballero, se preguntara se os delegados sindicais presentarían a súa dimisión tras o arquivo das denuncias. “É algo inaudito tendo en conta que una das funcións dos representantes sindicais é precisamente denunciar as irregularidades, neste caso contables, no manexo de diñeiro público“, reprobou.

Por este motivo, o sindicato afirmou que resulta “inadmisible” que se reclame a dimisión de delegados sindicais “por facer o seu traballo” mentres “se mantén no posto a concelleiros que levan anos desmantelando os servizos públicos”.