Axentes da Policía Nacional levarán a cabo labores de control e seguridade nas Illas Cíes durante este verán.

Fontes policiais explicaron que unha patrulla realizará labores de prevención mediante controis de pasaxeiros e equipaxes antes do embarque e inspeccións durante o traxecto. Ademais, percorrerá a zona de praias e outras con gran afluencia, como o ‘cámping’, o museo e os locais de hostalaría.

Así mesmo, os axentes informarán os turistas das medidas de seguridade a ter en conta durante a súa viaxe no marco da ‘Operación Verán’ que desenvolve a Comisaría de Vigo-Redondela no centro destas localidades e os areais ante o incremento de visitantes e a afluencia xerada polas rebaixas nesa tempada.

En concreto, a operación establecida para este ano está conformada por varios plans especiais e busca aumentar a rapidez e a eficacia da atención a vítimas de feitos delituosos, así como transmitir unha sensación de “maior seguridade” aos residentes en Vigo e Redondela e os turistas.