Axentes da Policía Local de Vigo detiveron a un home de 40 anos de idade, L.J.C.A., tras comprobar que, sobre el, pesaba unha orde de procura, detención e presentación emitida por un xulgado.
Segundo informaron fontes policiais, a detención produciuse ao mediodía deste mércores, cando unha patrulla se dirixiu á contorna do Centro Cívico de Teis para realizar labores de vixilancia, debido aos constantes avisos recibidos nas últimas semanas, sobre a presenza de grupos de persoas consumindo alcol e molestando aos usuarios do centro.
Cando os axentes chegaron á zona identificaron a catro homes que estaban a beber na vía pública e todos eles foron propostos para sanción por este feito. Ademais, un deles tiña en vigor unha orde de procura e detención, polo que foi arrestado nese momento.
Dáse a circunstancia de que o detido estivo envolvido nun altercado o ano pasado na rúa Rosalía de Castro, onde acudiu a Policía Local alertada por unha pelexa na vía pública. No transcurso da intervención dos axentes, este home tratou de arrebatarlle a arma a un dos funcionarios.
CONDUTOR DE PATINETE SANCIONADO
Por outra banda, a Policía Local de Vigo tamén informou da tramitación de denuncia con respecto a un mozo de 21 anos de idade, R.V.L., que conducía na tarde do mércores un patinete por unha zona peonil próxima á rúa Andalucía.
O mozo ía circulando mentres falaba por teléfono móbil, polo que foi interceptado polos axentes. Ao comprobar que presentaba signos de estar baixo os efectos dalgunha sustancia, realizóuselle o test de drogas, que deu positivo para cocaína e cannabis.
