O alcalde de Vigo, Abel Caballero, volveu a acusar á Xunta de pretender boicotear a construción da Biblioteca do Estado na cidade, e afirmou que o goberno galego “está a dicirlle ao Ministerio de Cultura que non a faga”.

Nunha rolda de prensa este luns, o rexedor olívico incidiu en que, desde que é alcalde, Vigo conta con catro bibliotecas adicionais (a Neira Vilas, a da UNED, a de Navia e a de Cásaa Patín en Bouzas), e lembrou que hai outras dúas “en marcha”: a de Teis e a Biblioteca do Estado.

“Volvo insistir: a Xunta oponse á Biblioteca do Estado en Vigo, e séguelle transmitindo ao Ministerio que non a constrúa”, denunciou, e proclamou que, a pesar de todo, esa infraestrutura será unha realidade.

En resposta ás críticas de Caballero sobre a Biblioteca do Estado, a delegada da Xunta, Marta Fernández-Tapias, apuntou que o goberno galego “sempre defendeu este proxecto, reclamando para a cidade a biblioteca que Vigo merece”

Respecto diso, incidiu en que é o Goberno de España o que propuxo “reducir á metade” o proxecto remitido pola Xunta no seu plan de usos, e afirmou que “o desexable fose que Caballero tamén defendese para Vigo unha mellor Biblioteca”.