A Plataforma en Defensa do Ferrocarril Vigo-Ourense por Mondariz constituíuse na cidade olívica como unha entidade da sociedade civil que busca promover unha alternativa ferroviaria “positiva e de futuro”, a través dunha formulación que aposta porque o tren conecte Vigo con Ourense nuns 25 minutos.
A rolda de prensa de presentación celebrouse na mañá deste xoves na cidade olívica, onde o presidente da entidade, Bieito Ledo, explicou que son un grupo de 14 persoas “moi diversas e sen tendencia política marcada tratando de representar á sociedade civil”, posto que “é imprescindible que a sociedade se organice presentando alternativas serias como esta”.
Entre as persoas que están na plataforma inclúense o presidente da Real Academia Galega, Víctor Fernández Freixanes; e o presidente da Confederación de Empresarios de Galicia (CEG), Juan Manuel Vieites; ademais de avogados, escritores, artistas e empresarios.
O secretario, Avelino Muleiro, comentou que a creación desta organización responde a “un tema social, pragmático, nada político”. Así as cousas, indicou que apoian que “non hai que aumentar os quilómetros ata Ourense e Madrid sen necesidade”.
Carlos Núñez Rodríguez, tesoureiro da plataforma, recalcou que Vigo é “un lugar crave dentro da comunicación de cidadáns e de mercadorías”, ante o que defendeu que a súa proposta permitirá “alixeirar gasto e tempo” respecto doutras formulacións como o de Guillarei, Cerdedo e Santiago.
O vicepresidente da plataforma e enxeñeiro encargado do informe, Xosé Carlos Fernández, explicou que a liña de tren que propoñen non arrinca en Vigo, senón que aproveita o saída sur e circularía polo norte de Mondariz. “Hai moita xente que cre que pasar por Cerdedo é o máis directo que existe, pero estivéronnos enganando, falan dunha liña ‘directa’ que non é tan directa“, aseverou.
PROPOSTA
Fernández apuntou que a actual proposta de AVE elevaríase a 2.200 millóns de euros, mentres que a formulación da plataforma permitiría aforrar uns 300 millóns –cun custo total estimado de 1.900 millóns–. “Se ían pór 2.200 millóns para unha liña de 50 minutos, aínda se tivese o mesmo custo deberían escoller unha liña con mellor servizo”, remarcou.
Segundo estimou, o tempo que requiriría levar adiante este proxecto ascendería a uns 9 anos e medio: 1 e medio para o estudo informativo, 2 para o impacto ambiental, 1 ano para os proxectos construtivos e entre 4 e 4 anos e medio para realizar a obra. “É o que necesita calquera liña deste tipo”, aclarou.
Tras a súa presentación pública, a plataforma enviará o seu informe ao ministro de Transportes, á presidenta de Adif, ao presidente da Xunta e aos alcaldes de Vigo e Ourense, aos que ademais lles pedirá reunións. Así mesmo, prevé establecer un programa de actividades, que irá comunicando paulatinamente.
HISTORIA DUN FRACASO
Durante a rolda de prensa, Fernández referiuse ao proceso de tramitación da alta velocidade entre Vigo e Ourense como “a historia dun fracaso”. “Non se fixo nada do planificado e nunca houbo nada para realizar un proxecto viable”, aseverou.
Así, a través do seu informe critica os “17 anos desperdiciados de estudos, reclamacións, demoras (*) sobre unha hipotética conexión ‘indirecta’ entre Vigo e Ourense pasando por Cerdedo”. “Levan todos estes anos dándolle voltas, mareando a perdiz; o Ministerio está a rirse da provincia e os cidadáns de Pontevedra”, censurou.
A continuación, remarcou que Ourense e Santiago están conectados por tren nun traxecto de 130 quilómetros, pero despois da alta velocidade quedará en 88 quilómetros, o que permitirá percorrer esa distancia en 25 minutos. “Iso é unha liña directa”, recoñeceu.
Neste sentido, cuestionouse “por que Vigo non pode reclamar o mesmo, un tren que reduza quilómetros e –conecte con Ourense– en 25 minutos, cando a súa poboación é maior”. “Vigo ten que pedir unha liña coas mesmas características que Santiago”, insistiu, apuntando que por Mondariz “se pode conseguir un percorrido de 86-88 quilómetros”.
