O Concello de Vigo presentará o vindeiro xoves na Feira Internacional de Turismo (Fitur) unha campaña de promoción turística a partir da que porá en relevo “o que é o Vigo actual: os elementos novos, a nova forma de entender a cidade, a nova cidade verde, a mobilidade vertical, os movementos culturais, as praias…”.
O alcalde da cidade olívica, Abel Caballero, subliñou que “Vigo é a mellor cidade de España”. “Dío a OCU”, que “designa a Vigo como a cidade española con máis calidade de vida”, valorando cuestións como a “seguridade cidadá, a oferta cultural, deportiva e de lecer, o medioambiente e a limpeza”, recalcou o edil.
No acto de presentación da campaña, que se celebrará ás 12,30 horas do xoves no pavillón número 9 do Instituto Feiral de Madrid (Ifema), farase unha representación de “un personaxe da cidade que se vai de neno e regresa agora”, 15 anos despois. Así, explicará “o que é o Vigo actual, os cambios que houbo” e “a nova forma de entender a cidade”.
“Somos unha cidade cunha transformación excepcional a efectos turísticos”, remarcou Caballero, que destacou que no evento está previsto que lle acompañen “dous grandes profesionais da comunicación” naturais da cidade de Vigo, en concreto a xornalista Paula Montes e o cómico Miguel Lago.
Segundo indicou, na presentación tamén se fará mención aos eventos relacionados co Nadal en Vigo –que é “un fenómeno turístico que deu a volta ao mundo”–, a Reconquista e o festival de Ou Marisquiño. “E aparecerá algo moi importante, e é que a situación na cidade resúmese en ‘Vigo, o mundo nunha cidade’, e ao fondo as illas Cíes”, concluíu.
