O conselleiro de Sanidade, Julio García Comesaña, confirmou o inicio da vacinación de mariñeiros de altura e grande altura este xoves en Vigo, un proceso que continuará o venres en Burela (Lugo).

García Comesaña lembrou que en febreiro mandaron unha solicitude ao Goberno pedindo que o fixese o Instituto Social da Mariña (ISM). Finalmente, explicou que esta semana se lles trasladaron os datos para que sexa a Administración autonómica quen proceda á vacinación con Janssen.

“Desde hoxe empezaron a vacinarse en Vigo, mañá en Burela”, sentenciou o conselleiro quen explicou que se fará en mariñeiros de altura e grande altura cos datos trasladados polo ISM.

Mentres, preguntado pola segunda dose de Astrazeneca, tras a decisión de pospolo unha semana máis, confirmou que se está esperando á información que resulte dos ensaios clínicos sobre a combinación de vacinas.

“E tamén esperando os primeiros resultados do ensaio clínico de Sanidade co Instituto Carlos III en varios hospitais de España”, apuntou Comesaña que non descartou que a próxima semana se poida ter xa “estudos preliminares”.

VOLTA AOS ESTADIOS

En canto á volta de público aos estadios, o conselleiro indicou que se decataron diso por rolda de prensa e que recibiron nesta xornada o protocolo.

O conselleiro dixo que o estudarán, aínda que remarcou que Galicia é unha autonomía que entraría na posibilidade de habilitar eventos deportivos deste nivel. “É un paso que se pode dar e se esas condicións se dan non haberá problema”.