InicioSociedadeDeclarado nulo o despedimento dun empregado de Goycar polo seu labor sindical

Declarado nulo o despedimento dun empregado de Goycar polo seu labor sindical

A xustiza observa "conduta antisindical" da empresa nun "marco de represalia claro" despois de que o empregado se queixase das horas extra.

PUBLICADO O

- Advertisement -

O Xulgado do Social número 2 de Vigo declarou nulo o despedimento dun empregado da empresa Goycar, a quen deu de baixa despois de constituír legalmente a sección sindical da CUT e tras queixarse de abuso de horas extra.

Neste fallo, con data do 28 de abril, o xuíz considera nulo o despedimento producido o 4 de xaneiro de 2021, á vez que condena a empresa á readmisión inmediata do traballador co pago dos salarios deixados de percibir, ademais dunha indemnización de 3.000 euros por vulneración dos dereitos fundamentais. Contra a sentenza cabe recurso ante o Tribunal Superior Xustiza de Galicia (TSXG).

Nos feitos probados, figura que o afectado, que realizaba na empresa deseño para compoñentes de automoción, participou en febreiro de 2020 nunha asemblea de operarios para falar sobre horas extra. Por este motivo, o xerente da empresa “reprochoulle que acudise a esa reunión”.

Unha vez terminado o ERTE pola pandemia, a empresa solicitou aos traballadores un sobresforzo, porque ademais coincidía o período de máis pedidos. Ante esta tesitura, o demandante indicou ao seu responsable que “non faría máis horas extra e que estas se estaban pagando por baixo de convenio”.

Así, o 17 de agosto de 2020 o demandante presentou un escrito en administración no que constaba a constitución da sección sindical de CUT na empresa, da que o demandante era o secretario. Días despois, por correo electrónico, o responsable pediulle que presentase un informe diario sobre o desenvolvemento do seu traballo. Igualmente, o fallo recolle exemplos de comunicacións realizadas por parte da empresa ao traballador de “conduta antisindical”, incluída a “ameaza” do xerente de “volver ser despedido se conseguía a nulidade”, no que o xuíz observa como “un marco de represalia claro”.

E é que na sentenza reflíctese que, no momento no que lle entregou a carta de despedimento, o xerente díxolle: “Sabes o que vai pasar se consegues a nulidade do despedimento? Que te vou volver botar”.

PRECARIEDADE NO SECTOR

Respecto diso, a CUT lamenta o despedimento deste afiliado, mentres resalta que “queda acreditada a represión sindical” da empresa Goycar, onde este empregado padeceu un “calvario con continuos menosprecios e discriminación por parte da súa xerarquía”.

“A precariedade laboral instalada nas pequenas empresas do sector, con continuos incumprimentos do convenio, está cimentada no sometemento das persoas traballadoras; ese sometemento baséase na capacidade da empresa de castigar a quen alza a voz e, con iso, meter medo ao resto das persoas traballadoras. Diego non quixo ter medo, reclamou os seus dereitos e sufriu as consecuencias de ter dignidade laboral. Agora a xustiza recoñece os abusos da empresa“, sostén a CUT.

Ademais, subliña que este martes, 4 de maio, será o día no que este empregado se reincorpore ao seu traballo baixo “ameaza de volver ser despedido, como así quedou acreditado en sede xudicial”.

ÚLTIMAS

O buque vigués ‘Robin M. Lee’, ao rescate dos tripulantes do palangreiro en perigo nas Malvinas

Os 27 tripulantes do palangreiro 'Argos Georgia', que nas últimas horas solicitaba axuda a 170 millas...

Unha carpa situada nas inmediacións do centro comercial A Laxe acolle unha experiencia de realidade virtual para concienciar sobre a ciberseguridade

O Instituto Nacional de Ciberseguridade (Incibe) organiza esta semana en Vigo a exposición '#ExperienciaIncibe' de realidade...

Encontran o cadáver dun home dentro dun piso de Vigo despois da alerta dos veciños polo mal cheiro

Os servizos de emerxencia acharon o cadáver dun home nun piso de Vigo despois...

Case 1.300 empresas galegas logran algún dos 10 indicadores Ardán

Un total de 1.289 empresas galegas lograron algún dos 10 indicadores Ardán, co almacenista...