Máis de 2.000 persoas, unhas 1.200 segundo a Policía Local, marcharon este sábado polas rúas do centro de Vigo convocadas polos sindicatos con motivo do 1 de maio para reivindicar que “agora toca cumprir cos traballadores” e para urxir unha “saída xusta” da crise, nunhas manifestacións menos concorridas que as dos últimos anos e marcadas polos protocolos anti-covid.
Así, a primeira manifestación en poñerse en marcha foi a de Comisións e UGT na que participaron os responsables galegos de ambas as organizacións, Ramón Sarmiento e José Antonio Gómez. Ambos os dirixentes sindicais puxeron en valor o carácter reivindicativo desta xornada, especialmente despois de que non puidese celebrarse o pasado ano pola pandemia e subliñaron que “agora si toca cumprir” por parte das administracións coa clase traballadora.
Mentres, o secretario nacional da CIG, Paulo Carril, que participou na marcha deste sindicato reclamou “unha saída galega xusta á crise“, así como “políticas alternativas” ás que agora están a provocar “a desertización industrial e social de Galicia”.
Ademais destas marchas, as rúas de Vigo tamén foron escenario da manifestación convocada por CUT, CXT, Sindicato Ferroviario e STEG, na que participaron unhas 250 persoas baixo a lema ‘O capitalismo: a auténtica pandemia’.
Por outra banda, un grupo duns 50 traballadores do metal irromperon a marcha convocadas por Comisións, UGT e CIG denunciando que os sindicatos estatais teñan firmado o convenio provincial do sector.
