Un taxista de Vigo aceptou abonar 900 euros de multa como autor dun delito de lesións, despois de que golpease a unha clienta na boca, causándolle un hematoma e a rotura parcial dun dente, no transcurso dunha discusión por “desavinzas” no pago dunha carreira.

A vista estaba sinalada para a mañá deste mércores no Xulgado do Penal número 3 de Vigo, aínda que fontes próximas ao caso comunicaron que as partes chegaron a un acordo de conformidade.

Desta forma, aínda que inicialmente a Fiscalía solicitaba unha multa por un total de 2.700 euros, despois de que o acusado abonase a responsabilidade civil –155 euros pola sanidade das lesións e a reconstrución do dente da muller– aplicóuselle a atenuante de reparación do dano, de forma que unicamente terá que abonar 900 euros de multa.

De acordo co escrito de Ministerio Público, os feitos ocorreron sobre as 5,15 horas do 15 de decembro de 2018 na rúa Venezuela, no centro de Vigo, cando o taxista comezou a discutir con dúas clientas por “desavinzas” no pago dunha carreira.

No transcurso da discusión, unha delas sacou o seu móbil para sacar unha foto da matrícula do taxi, aínda que o acusado tentou quitarllo, golpeando a unha das mulleres na boca. Como consecuencia, causoulle un hematoma pequeno na cara interna do beizo e a rotura parcial dun dente, aínda que non quedaron secuelas nin prexuízo estético.