A sección primeira da Audiencia Provincial de Pontevedra estimou o recurso de Audasa, concesionaria da AP-9, contra a sentenza que a condenaba a devolver as peaxes aos usuarios da autoestrada afectados polas incidencias xeradas polas obras na ponte de Rande, e que ocasionaron numerosas retencións.

O xulgado do Mercantil 1 de Pontevedra condenou a Audasa a restituír o importe cobrado de forma “abusiva” aos usuarios afectados por eses problemas, rexistrados entre febreiro de 2015 e xuño de 2018 (período no que se desenvolveron as obras de ampliación da autoestrada).

Tanto Audasa como a Fiscalía e a asociación En Colectivo presentaron recurso de apelación. Agora, a Audiencia Provincial estimou o recurso da concesionaria, aínda que desestimou os recursos interpostos polo resto das partes.