O comité clínico deste martes, que asesora á Xunta na toma de decisións, analizará a situación “preocupante” de Vigo e, aínda que o conselleiro de Sanidade, Xullo García Comesaña, non quixo avanzar as decisións, si augurou que se terán que tomar medidas ante unha incidencia que se está disparando.
En declaracións aos medios nunha visita Verín, destacou que, “por sorte, a situación de Galicia non é mala”, pero alertou de que “preocupa a área sanitaria de Vigo”. “Evidentemente gustaríanos que a incidencia acumulada estivese por baixo de 50, pero aínda así, cos datos que temos hoxe, non é mala”, considerou.
Actualmente, a incidencia é de 88 por cada 100.000 habitantes, unha marca que obriga “a estar pendentes en todo momento das medidas” que se toman, principalmente, dos pacientes que se infectan.
Comesaña apuntou que a Xunta segue traballando para pór todas as meidas co fin de que a situación “non vaia a peor”, e, de feito, indicou que “os resultados o han ido demostrando”.
Con todo, aínda que a situación en xeral é boa, non é “homoxénea” en toda Galicia. Así, hai zonas que “están nunha situación francamente boa, moitos concellos con ningún caso que se manteñen, pero tamén hai concellos onde se está incrementado”.
No caso da área sanitaria de Vigo, a incidencia a sete días está por encima do limiar establecido para as medidas básicas, polo que será analizado no comité clínico deste martes e “tomaranse as medidas acordes á situación” de cada concello.
Para os concellos de máis de 20.000 habitantes, está fixado o límite de restricións en 150, algo ao que non chega Vigo, pero “está moi preto”. Ademais, a incidencia a sete días multiplicada por dous, xa o sitúa neste valor. Hai que ter en conta que o comité clínico toma en conta agora os valores a sete días como un dos parámetros principais, debido á prevalencia da cepa británica e variantes máis contaxiosas en xeral, de maneira que pretende actuar antes fronte ás incidencias.
“Non quero adiantar ao que se poida dicir mañá (por este martes) no comité, pero o probable é que en Vigo teñamos que tomar medidas nestes próximos días”, dixo Comesaña, quen defendeu que, onde houbo que pór medidas adicionais despois de Semana Santa, “xa se puxeron”.
Comesaña lembrou que agora mesmo hai tres concellos con restricións máximas, é dicir, con peche perimetral e da hostalaría –O Grove, A Pobra do Caramiñal e Cualedro–, pero tamén puxo o acento en que hai municipios “con cero casos” e que manteñen “un comportamento bo epidemiológicamente”. En todo caso, se entre o martes e o venres hai que “dar algún paso atrás, por suposto, darase”, sentenciou o conselleiro de Sanidade.
Precisamente, o venres pasado entrou en vigor a ampliación do toque de queda ás 23 horas e a posibilidade de realizar ceas en locais de hostalaría con licenza de restaurantes.
