Axentes da Policía Local de Vigo recuperaron unha serpe que se introduciu nunha vivenda, tras recibir o aviso do propietario da mesma, e soltárona no seu hábitat.

Segundo informaron fontes policiais, o aviso foi recibido sobre as 17,30 horas do pasado martes, cando un veciño da rúa Vista do Mar alertou ao 092 de que localizara unha serpe detrás dunha porta da súa vivenda. Unha dotación policial trasladouse ao lugar e recuperou o animal, un exemplar de serpe bastarda (Malpolon monspessulamus, da familia Lamprophiidae), que foi devolto ao seu hábitat.

Por outra banda, a Policía Local tamén informou do incendio dun vehículo que se atopaba estacionado na avenida Alcalde Lavadores. O incendio rexistrouse á primeira hora da tarde do mércores e ata a zona desprazáronse efectivos de bombeiros e da Policía Local. O condutor, un home de 52 anos de idade, explicou aos axentes que se atopaba traballando nunha nave próxima, cando viu saír fume repentinamente do coche. As chamas, que probablemente tiveron a súa orixe nun curtocircuíto, causaron importantes danos na parte dianteira do vehículo.