Sete días despois do final da Semana Santa, a presión hospitalaria que deixa a pandemia da covid-19 en Galicia repuntou con cinco pacientes máis, ata o total de 172 persoas ingresadas. Isto prodúcese na terceira xornada consecutiva na que subiron, aínda que lixeiramente, a cifra de casos activos da enfermidade, que se sitúan nos 2.305. En canto ás hospitalizacións por coronavirus, segundo os datos que ofrece este domingo a Consellería de Sanidade, solicitados ata as 18,00 do sábado, aumentaron tanto en planta –147, cinco máis– como nas unidades de coidados intensivos –27, dous máis–.

Concretamente na área de Vigo a cifra de hospitalizados mantense, con 27 enfermos en unidades convencionais –un menos– e seis en coidados intensivos –un máis–. En canto aos casos activos de covid-19 en Vigo, descenden ata os 614 (11 menos ca na xornada anterior). Con todo, dos novos contaxios que se suman ao cómputo global de Galicia, a área de Vigo volve liderar o ranking con 46 infeccións detectadas; seguida da Coruña-Cee, con 41.

PCR E TAXA DE POSITIVIDADE

De acordo cos datos de Sanidade deste domingo, en Galicia realizáronse 1.911.637 PCR en total, o que supón 6.211 probas diagnósticas ao longo das últimas 24 horas –case 900 menos que o día previo–. En canto á taxa de positividade, mantense en torno ao 3%, polo que segue por baixo do 5% que a Organización Mundial da Saúde (OMS) fixa para dar por controlada a pandemia.

VÍTIMAS E CURADOS

Desde o inicio da pandemia faleceron en Galicia 2.368 persoas diagnosticadas de covid-19, despois de que na xornada do sábado a Consellería de Sanidade non notificase ningunha nova vítima. Así mesmo, ata o momento curáronse deste coronavirus en Galicia un total de 113.955 pacientes. Isto permite deducir que nas últimas 24 horas recibiron a alta outras 155 persoas.