A Asociación Veciñal de Teis Chapela e Trasmañó convocou este sábado unha manifestación para esixir a supresión da peaxe da AP-9 no tramo Redondela-Vigo, e a súa conversión en tramo urbano. A mobilización comezou na rotonda de Padín e transcorreu ata a Avenida de Buenos Aires.

Á protesta acudiu, entre outros rostros coñecidos, o deputado nacionalista no Congreso Néstor Rego, que reclamou a aplicación do acordo de investidura entre o BNG e o PSOE nesta materia.

“Unha das reivindicacións históricas dos veciños de Vigo e Redondela é a eliminación de peaxes do tramo entre estes dous concellos. Non pode ser que, a día de hoxe, se siga pagando por un percorrido de 10 minutos que conecta dous municipios limítrofes“, dixo Rego.

Así mesmo, o deputado reclamou a humanización do tramo que comeza nas Torres de Padín e a mellora dos pasos elevados. “Hai que eliminar o tráfico pesado en Teis e Chapela e mesmo instalar pantallas contra o ruído”, explicou.