A Policía Local de Vigo tramitou varias denuncias contra condutores, que foron sorprendidos circulando baixo os efectos de alcol e drogas o pasado fin de semana. Segundo informaron fontes policiais, o pasado 19 de marzo, pouco antes da medianoite, foi interceptado un condutor na rúa Marqués de Alcedo, xa que circulaba sen luces. Ao ser preguntado polos axentes achega do motivo do seu desprazamento fóra do horario permitido, o condutor alegou que viña de deixar a un amigo no municipio de Mos.

Durante a entrevista os policías decatáronse de que o home, D.M.G., de 50 anos de idade, presentaba síntomas de estar baixo os efectos do alcol, polo que foi sometido a unha proba, que arroxou un resultado de 0.61 e 0,60 mg/l. Por iso foi proposto para sanción por unha infracción de tráfico e por saltar o ‘toque de queda’

Esa mesma noite, unha hora despois, a Policía identificou e propuxo para sanción a un mozo de 22 anos de idade, L.G.D.S., que foi localizado circulando nun patinete eléctrico na confluencia das rúas Doutor Canoa e Mestre Chané. O mozo, ademais de non portar pezas reflectoras e ir en sentido contrario, deu positivo por THC no test indiciario que se lle realizou.

Esa madrugada tamén foi identificado e denunciado o condutor dun turismo, de 23 anos de idade, M.A.G.F., que foi interceptado na confluencia de Gran Vía con Ecuador. O mozo deu positivo por cannabis no test de drogas.

Finalmente, o pasado fin de semana tamén foi denunciada de madrugada unha condutora, M.L.P., de 39 anos de idade, que foi sorprendida na confluencia de Cachamuíña e Praza do Rei circulando baixo os efectos das drogas. A muller foi sometida a unha proba que deu resultado positivo para cocaína e opiáceos e, ademais deste delito contra a seguridade viaria, tamén foi sancionada por estar na rúa fose do horario permitido sen motivo xustificado.