As competicións de equipos de elite que se celebren en instalacións deportivas municipais de Vigo volverán ter público, aínda que con restricións, debido á mellora na evolución da pandemia de COVID-19.

Así o confirmou este mércores en rolda de prensa o alcalde, Abel Caballero, quen explicou que se porá en marcha un protocolo “con seguridade cen por mil” e que non permitirá superar os 150 espectadores en ningún, e sempre que esta cantidade non supoña exceder o 30 por cento da capacidade do recinto (e garántase a separación de 1,5 metros entre as persoas).

O público asistente ás competicións deberá levar en todo momento máscara, terá que estar sentado todo o tempo (mesmo nos descansos), salvo para ir ao baño, e non se poderá comer no recinto. Así mesmo, deberán achegar os seus datos de contacto, que serán custodiados pola entidade deportiva ata un mes despois do evento para facilitalos ás autoridades sanitarias se fose necesario. Pola súa banda, as entidades deportivas deberán presentar, como moi tarde 72 horas antes da competición, un plan de prevención de contagios seguindo a normativa antiCOVID.

Segundo explicou o alcalde, o pavillón de Coia terá un aforamento máximo de 132 persoas; o de Bouzas, 150 persoas; o de Candeán, 69 persoas; o de Bembrive, 96 persoas; o pavillón de Navia, un máximo de 150 persoas; o pavillón das Travesas, 150 persoas; as pistas de atletismo de Balaídos, 150 persoas; o campo de fútbol de Sárdoma, un 30 % da súa capacidade; e o campo do Vao, un 30 % da súa capacidade.

Os clubs e entidades afectados por esta autorización son: UB Lavadores e AD Carballal (balonmán feminino); CD Bosco (baloncesto feminino); Vigo Voleibol (voleibol masculino); CD Amfiv (baloncesto masculino); Bembrive FS (fútbol sala feminino); Sárdoma CF (fútbol feminino); Celta Atletismo (atletismo masculino); e Coruxo CF (fútbol masculino).