O Festival Primavera do Cinema abriu a convocatoria de presentación de películas de produción galega ou lusófona de cara á celebración da súa décima edición, que terá lugar en Vigo entre o 7 e o 12 de setembro.

Segundo informou a organización, a convocatoria permanecerá aberta ata o próximo 30 de abril para pezas producidas a partir de 2019. En concreto, poderán presentarse tanto curtametraxes, longametraxes e videocips de produción galega como curtametraxes e longametraxes de países lusófonos.

O evento, que se celebrará no Auditorio Municipal do Concello de Vigo e no Museo Marco, celebra este ano a súa décima edición, na que se elaborará “unha programación de alta calidade, en correspondencia co bo momento polo que está a pasar a cinematografía galega”.

Así, ofreceranse títulos de xéneros cinematográficos e propostas estéticas “moi variadas” e daranse a coñecer títulos de referencia internacional. Ademais, “farase un esforzo” para realizar “actividades paralelas que enriquezan” o festival.

A organización indicou, finalmente, que nesta edición se abrirá unha sección específica para curtametraxes infantís, cuxo premio estará concedido por un xurado composto por nenos e nenas de entre 8 e 12 anos de idade.